ഷെയര്‍ മാര്‍കറ്റില്‍ ഇന്‍വെസ്റ്റ്‌ ചെയ്യുന്ന കാര്യം പറയുമ്പോള്‍ പലരുടെയും മനസ്സില്‍ ആദ്യം വരുന്ന കാര്യം അത് കാശ് പോകുന്ന ഏര്‍പാടാണ് എന്ന ഒരു വിശ്വാസം ആണ്.
അതിന്‍ അവര്‍ക്ക് ഒരു പാട് ഉദാഹരണങ്ങളും പലരും പറഞ്ഞ അനുഭവങ്ങളും ഉണ്ടാകും. ഒരു വേദിയില്‍ സംസാരിക്കാന്‍ അവസരം കിട്ടിയപ്പോള്‍ ഞാന്‍ തെരഞ്ഞെടുത്ത വിഷയം സ്റ്റോക് മാര്‍കറ്റില്‍ എങ്ങിനെ ഇന്‍വെസ്റ്റ്‌ ചെയ്യാം എന്നതായിരുന്നു. ഞാന്‍ അത് പറഞ്ഞു തുടങ്ങുമ്പോള്‍ തന്നെ പലരുടെയും മുഖത്ത് ഒരു കള്ളച്ചിരി കണ്ടു. അതില്‍ പലരും മുമ്പ് പണം നഷടപ്പെട്ടവരോ അല്ലെങ്കില്‍ അത് ഒരു പണം നഷ്ടപെടുത്തുന്ന പരിപാടിയാണ് എന്ന് വിസ്വസിക്കുന്നവരോ ആയിരുന്നു.
ഇപ്പോള്‍ ഒരു സാധാരണക്കാരന് ലഭ്യമായ നിക്ഷേപാവസരങ്ങില്‍ ഏറ്റവും നല്ല നേട്ടം നല്‍കുന്ന നിക്ഷേപ മാര്‍ഗം ഷെയര്‍ മാര്‍കറ്റ്‌ തന്നെയാണ്. ഇന്ന് നാട്ടിന്‍ പുറങ്ങളില്‍ കാണുന്നത് കയ്യിലുള്ള സമ്പാദ്യം ഏതെങ്കിലും ലോക്കല്‍ ബിസിനസില്‍ ഓണര്‍ഷിപ്പ് അവകാശം ഒന്നും ഇല്ലാതെ നിക്ഷേപം ആയി കൊടുത്ത് അതില്‍ നിന്ന് ഒരു മാസവരുമാനം വാങ്ങുക എന്നതാണ്. പക്ഷെ കുറച്ചു കഴിയുമ്പോള്‍ വരുമാനവുമില്ല മുതലും ഇല്ല എന്നാ അവസ്ഥ സര്‍വ സാധാരണം ആണ്. ഇതിന്റെ പത്തിലൊരു റിസ്ക്‌ പോലും ഷെയര്‍ മാര്‍കറ്റ്‌ നിക്ഷേപത്തിന്‍ ഇല്ല. എന്നാല് ഷെയര്‍ മാര്കടിലെ ലാഭ സാധ്യത പലപ്പോഴും ഇത്തരം നിക്ഷേപത്തേക്കാള്‍ എത്രയോ ഇരട്ടി ആണ് താനും.
ഷെയര്‍ മാര്‍ക്കറ്റില്‍ ഇന്‍വെസ്റ്റ്‌ ചെയ്യുക എന്നാല് നന്നായി നടക്കുന്ന കമ്പനികളുടെ ഷെയര്‍ വാങ്ങുക എന്നതാണ്. അപ്പോള്‍ ഏതു ബിസിനസ്സിലും എന്നത് പോലെ നഷ്ട സാധ്യത ഷെയര്‍ മാര്കടിലെ ഇന്വേസ്റ്മെന്ടിലും ഉണ്ട്. പക്ഷെ എല്ലാ കമ്പനികളും ബിസിനസ്കളും നഷ്ടത്തില്‍ അല്ലല്ലോ കാലങ്ങളോളം അതിജീവിച്ചു പോകുന്നത്! അപ്പോള്‍ നല്ല നിലയില്‍ പ്രവര്‍ത്തിക്കുന്ന ലാഭം ഉണ്ടാക്കുന്ന കമ്പനികളുടെ ലാഭത്തിലും വളര്‍ച്ചയിലും പങ്കാളികളാകാന്‍ ഉള്ള ഒരു മികച്ച അവസരം ആണ് ഷെയറുകള്‍ വാങ്ങുക എന്നത്! അത്തരം കമ്പനികളുടെ ഉടമസ്ഥതയിലുള്ള ഒരു പങ്ക് കൂടെയാണ് ഷെയര്‍ വാങ്ങുന്നതിലൂടെ ലഭിക്കുന്നത്.
നമ്മള്‍ നല്ലതെന്നു വിശ്വസിച് വാങ്ങി നമ്മുടെ പ്രതീക്ഷയ്ക്കൊത്ത് ഉയരാത്ത അല്ലെങ്കില്‍ പിന്നീട് ആ കമ്പനി തകര്‍ച്ചയിലേക്ക് പോകുന്ന ഒരു സാഹചര്യമാണ് ഒരു നഷ്ട സാധ്യത. ഒരു കമ്പനിയെ സംബന്ധിച്ചും അതിന്റെ ബിസിനസ്സിന്റെ സംബന്ധിച്ചും പബ്ലിക്കായി ലഭ്യമായ വിവരങ്ങള്‍ വച്ചാണ് കമ്പനികളെ വിലയിരുത്തുന്നതും വാങ്ങാന്‍ തീരുമാനിക്കുനതും. അങ്ങിനെയുള്ള വിലയിരുത്തലില്‍ തെറ്റ്പറ്റാം. ഇവിടെ ആണ് എല്ലാ മുട്ടയും ഒരു കുട്ടയില്‍ വെക്കരുതെന്ന ചൊല്ല് അന്വര്തമാകുന്നത്. നമ്മുടെ കയ്യില്‍ ഷെയര്‍ മാര്‍കറ്റില്‍ ഇന്‍വെസ്റ്റ്‌ ചെയ്യാന്‍ ഉദ്ദേശിച്ച മുഴുവന്‍ തുകയും ഒന്നോ രണ്ടോ കമ്പനികളില്‍ മാത്രമായി ഇടാതിരിക്കുക എന്നതാണ് ഇവ്വിധത്തിലുള്ള നഷ്ടം കുറക്കാന്‍ ഉള്ള ഒരു മാര്‍ഗം. മൊത്തം തുകയുടെ വലിപ്പം അനുസരിച്ച് പത്തു മുതല്‍ മുപ്പത് വരെ കമ്പനികളില്‍ ആയി നിക്ഷേപിക്കുക. അപ്പോള്‍ ഒന്നില്‍ പിഴച്ചാല്‍ മറ്റുള്ളവയില്‍ അത് പരിഹരിക്കാം.
മറ്റൊരു നഷ്ട സാധ്യത ഹ്രസ്വകാലയളവില്‍ മാര്‍കറ്റില്‍ ഉണ്ടാകുന്ന ഇടിച്ചല്‍ ആണ്. അത് പക്ഷെ ഒരു ദീര്ഘകാല നിക്ഷേപകരെ ബാധിക്കുന്ന കാര്യമേ അല്ല. ഇത്തരം അവസരത്തില്‍ നഷ്ടം സംഭവിക്കുന്നത് ആ തകര്‍ന്ന വിലയില്‍ വില്‍ക്കുമ്പോള്‍ മാത്രമാണ്. നമ്മള്‍ ഷെയര്‍ വാങ്ങിയ കമ്പനിയുടെ സാമ്പത്തിക അവസ്ഥയിലും ബിസിനസിലും കുഴപ്പമൊന്നും ഇല്ലെങ്കില്‍ മാര്‍കറ്റില്‍ ഉണ്ടാകുന്ന തകര്‍ച്ച നമ്മളെ വേവലാതിയില്‍ ആക്കേണ്ട ആവശ്യമേ ഇല്ല. കാശ് ഉണ്ടെങ്കില്‍ കുറഞ്ഞ വിലക്ക് ഇനിയും കൂടുതല്‍ വാങ്ങാനുള്ള അവസരമായി ആണ് അത്തരം തകര്ച്ചകളെ കാണേണ്ടത്.
ഇത് പോലെ ചില കരുതലുകള്‍ എടുത്ത് കാര്യങ്ങള്‍ മനസ്സിലാക്കി ഇന്‍വെസ്റ്റ്‌ ചെയ്യുന്നവര്‍ക്ക് ഷെയര്‍ മാര്‍കറ്റ്‌ നിക്ഷേപം ഒരിക്കലും നഷ്ടം ആകില്ല.
